Pancuran caina masih ngocor tur herang
Bangbaluh anggeur masih tinggulayut
Dina kahariwang nyorang mangsana
Dina baluas tapak kalangkang
Indung
Geuning jero sagara kahirupan teh.
Pancuran caina masih ngocor tur herang
Angkara anggeur masih kumalendang
Di gedong buleud nu aripis biwir
Di gedong pasagi nu umaing
Di gedong lonjong nu heurin ku bab jeung pasal
Indung
Naha enya Rahwana acan perlaya ?
Pancuran caina masih ngocor tur herang
Pipireun tajug sajeroeun lilinggeran
Malah nyangkrung dina sela-sela rasa
Yen poek jubahna hideung
Yen caang anyaclang atra
Nu nyumput nu teu kaharti
Nu dirusiahkeun jeung nu acan karandapan
Ukur heula pandeuri jeung kahanjakal
Indung
Geuning jerona sagara teh mun teu teuleum
Pancuran caina masih ngocor tur herang
Sanajan talangna geus taihiangan
