Lalampahan teh geuning geus jauh, baeu ngarambah bauna taneuh beureum
Itungan milang kori ngaranjah tegal siawat-awat malah ngapung jucung ka alak paul
Munasabah,
Ana prak reureuh, kareret tapak jeblog ku leutak balas balangah
Pan ngimpina oge masih angger diudag barongsay
Umur nu ditutur-tutur
Leuirna alah batan kuda nu ngencar ti gedogan
Ukur ngaberung nafsu ngumbar amarah
Hanas ……………………….
Dada mimiti muriang
Umbul-umbul mimiti pating pecenghul, gugupay!
Aya hanjakal teu bisa nyieun kahadean sapanjang napas malah pasadat
Tetela sasab teh kamalinaan
Asa jauh tina kakuduan
Hanca hirup nu ngan kari satungtung kalakay
Udagana…………………………
Na iftitah jeung Alfatihah, ruku jeung sujud sugan panggih Safaat Nabi tepung Hampura Gusti.
